病了

"完了"之後居然是"病了"。

明明返工就唔係辛苦，無理由一唔洗返工就病架！

本來打算星期二我last day返學校聽個seminar，再去個job interview，夜晚 farewell 同房，點知所有野都做唔到。

星期一晚在家食晚飯，食完飯都冇乜事。點知隔咗幾個鐘，個肚開始唔妥。結果係上吐下瀉，一晚嘔咗7次，真係破晒記錄。

星期二本來都諗住去interview，話晒見工冇理由改時間，但係結果都係連衫都冇力熨，更加唔好話出門口啦，所以都係迫於無奈地改時間。但係咁搞法，俾我都唔請啦，唉……

結果成日自己係屋企，水又飲唔到，野又食唔到，要等都媽媽五點放工返屋企先可以陪我去睇醫生。點知去到睇，平時睇開個醫生居然放假，替工既醫生係年紀有返咁上下，經驗好豐富，但係會不停咁重覆自己講過既野。一入去同佢講嘔咗成晚，結果轉個頭佢又問我係疴定嘔。結果係有史以黎係間醫生房裡面留得最耐既一次。

臥床三日，到今日先叫做好返。準備好今日要interview，因為早個幾星期收到信，已經打咗電話去confirm，但寫埋落schedule book。換晒衫，出咗門口，上埋地鐵，去到油塘站，攞封interview信出黎一望，日期係14.5.2007，望望錶，唔係好信，再望望電話。唉，原來早個幾星期已經病咗。

我諗都應該唔會有人請我架勒……