今時今日咁既服務態度……點得架?!

雖然我對阿華生講呢句「今時今日咁既服務態度……點得架?!」好反感，但係今日佢實在係太切合我既心聲，所以都要借黎用一用。
因為阿莉姐仲未買到星期六阿雯姐結婚註冊時穿的禮服，所以就要陪佢周圍逛啦，作最後衝刺嘛，行吓行吓去到IFC既ZARA，本來好興奮，因為一入門口已經見到條裙 (Dress A)好鬼啱佢，梗係叫佢立即去試啦，入去試既途中，阿莉姐就見到掛係更衣室旁邊 (即係其他人試完，但係唔啱心水，放底返件衫既地方)，又有另一條裙都OK (Dress B)，但係咁冇野啦，因為之前行完成間鋪都見唔到，咁佢就入咗去更衣室試裙 ，咁我就出咗去諗住幫佢搵搵啦，但係我都係搵唔到喎，咁就攞咗另一條裙 (Dress C) 諗住叫佢試，跟住去到更衣室門口，其中一個sales就話唔可以咁樣攞另外一條裙俾佢試，如果要試另一個款就要排過隊咁話，OK,FINE! 咁咪放底條裙 (Dress C) 唔試囉 (但係中途我見到啲 sales係好殷勤咁serve啲外國人同自由行喎，係幫佢地攞晒size同唔同款式既衫喎)，直至阿莉姐試完Dress A話OK，但係都係想試埋Dress B，咁咪出去諗住問吓sales 件Dress B 放係邊，諗住自己出去幫佢攞個啱既size俾佢試囉，跟住:
我：「唔該，我想問吓Dress B 放係邊架？」
短曲髮、高高地Sales ：「應該係幅畫個喥，(手指指)係個喥，不過……我都唔知喎……嘻嘻」
阿姐，咩事呀???!!! 我唔係同你玩喎，你唔係咁答問題呀嘛，我知你間野多人，都唔係咁既態度呀嘛?! 你唔幫我搵都算啦，咁唔代表你可以同我講你唔知條裙放係邊呀嘛??!!同埋我都唔係覺得你好忙啫，你都係同其他sales係喥吹水啫，你唔係覺得你咁答我好型呀嘛，你係服務性行業，唔該你俾返少少最起碼應有既態度好唔好??!!
真係扯火！！